In India, school principals cut the hair of 84 students

 

کھنؤ: بھارتی ریاست اتر پردیش کے مارواڑ انٹر کالج اسکول کے پرنسپل نے پابندی کے باوجود لمبے بال رکھنے والے 84 طلبا کے بال خود کاٹ دیئے۔

بھارتی میڈیا کے مطابق اترپردیش کے ایک اسکول کے میدان میں 84 طلبا سر جھکائے بیٹھے ہیں اور پرنسپل صاحب ایک ایک کر کے کان سے اوپر اور گردن سے نیچے بالوں کو کاٹ رہے ہیں۔

اسکول انتظامیہ کا کہنا ہے کہ طلبا کو لمبے بال رکھنے سے منع کیا گیا ہے۔ یہ اسکول کے قواعد و ضوابط کی خلاف ورزی ہے۔ طلبا کو بار بار تنبیہ بھی کی گئی تھی۔

اسکول پرنسپل راجیش یادو نے اپنے اقدام کو طلبا کی جانب سے قوانین کو توڑنے کی سزا قرار دیتے ہوئے کہا کہ کورونا وبا کے دوران زیادہ تر وقت طلبا نے گھر میں گزارا اور اس دوران کچھ زیادہ ہی ماڈرن اور فیشن ایبل ہوگئے۔

پرنسپل نے مزید نے کہا کہ گھر میں ان لوگوں کو روکنے والا کوئی نہیں تھا۔ میں نے انہیں سبق سکھانے کے لیے بال کاٹے۔ یہ میرا فرض ہے کہ طلبا کو نظم و ضبط کا طریقہ سکھاؤں۔ اسکول آنا ہے تو انسان بن کے آنا ہوگا۔

تاہم طلبا نے اسے ذلت آمیز اقدام قرار دیا۔ دو طلبا کے والدین نے محکمہ تعلیم کے اعلیٰ حکام سے شکایت بھی کی ہے۔ پولیس نے بھی پرنسپل کو طلب کیا لیکن ان کے مؤقف کو درست مان کر کوئی مقدمہ درج نہیں کیا گیا۔

پرنسپل کی ایک قطار میں کھڑے طلبا کے بال کاٹنے کی ویڈیوز اور تصاویر سوشل میڈیا پر وائرل ہوگئیں۔